POTTEBAKKER EN SY KLEI

Met dank en erkenning aan Alta du Plooy

Ek het altyd gewonder hoe werk God regtig met jou as Hy jou begin skaaf en soos die Woord sê, suiwer soos goud gesuiwer word.....
Die afgelope tyd het daar soveel dingetjies skeef geloop en gebeur dat ek vir God gevra het:"Hoekom? Ek het U dan vertrou met dit of dat"? Ek het baie keer aan die stry geraak met God want ek weet nie waarmee was Hy besig en wat Sy doel was met als nie. Tog het ek geweet Hy werk op snaakse maniere en Hy was besig met my. Ek het 'n sms gekry wat gesê het "God het bietjie karakter vorming gedoen..." en vir die eerste keer het ek besef dis wat die "skaaf" en "suiwering" beteken. Al was dit so seer dat ek soms gevoel het ek wil nie meer aangaan met hierdie bediening nie, ek is nie opgewasse hiervoor nie en ek het gevoel soos 'n failure.

Ek kon vir die eerste keer seker wees God werk aan my karakter en dit was my keuse, om die kruis op te tel en te doen wat God wil. Al weet ek soms steeds nie wat Hy wil hê ek moet doen nie, weet ek die Gees lei my en Hy is getrou. Al val ek steeds is dit deel van my heiligmaking en so leer ek God elke dag beter ken

In die Woord staan "Ek is die pottebakker en jy die klei." Soms val die klei op die grond en dan moet die Pottebakker die klei weer opbou. Daar waar krake is moet Hy opvul, die klei moet in 'n baie warm oond gebak word om hom sterk te maak en dan moet die klei geglaze word dat hy blink en dan moet hy weer gebak word om die VOLLE potesiaal te bereik. God vra ook selfs in Sy Woord: Mag die pottebakker dan nie maak wat Hy wil met die klei nie....? Ek het op die punt gekom wat ek vir God gesê het: "Maak met my soos U smaak" Al is dit seer weet ek dit is tot Sy eer!